79 சிவன் 29/07/2017

  பல்லவி 

வேட்டை மார்க்கமாய் வந்து வினை தீர்த்திடுவீர் சிவனே 

மாட்டேன் மாட்டேன் நினது பதம் விடமாட்டேன் வீரனே                                                                                                    

                                                                                                                வேட்டை  

                                         அனுபல்லவி 

கோட்டை அரண் போல் நின்று  பகைவரறுவரை அழித்திடுவீர் 

சாட்டையாகி அகிலமனைத்தையும் ஆட்டுவிக்கும் ஆண்டவனே                                                                                                       

                                                                                                                       வேட்டை 

                                                சரணம் 

தினம் துதிப்பேன் திருநீறு பூசிய திருமேனியனே திண்ணனே 

மனக்கவலையனைத்தும்  மறைந்திடுமே மகாதேவனருளால்

தனம் தான்யம் வீடு வாசல் மாடு மனை ஏதும் வேண்டிலேன் 

நினைநாளும் நினைந்துருகுவேன் நீலகண்டனே நீயே  கதி 

                                                                                                                      வேட்டை

78 Parashakti 23/07/2017

                                            பல்லவி 

அம்பா நவமணிமாலைதனை கவி காளிதாசன் 

தீம்பா  மாலையாய் அர்ப்பித்தான் உந்தனுக்கு 

                                                                                          அம்பா 

                                    அனுபல்லவி 

வெம்பாவி  நானுனக்கு  சிறுமலர் தந்திடலாகுமோ 

தம்பியொடு வேழமுகத்தானுக்குத் தாயே  தயாபரியே 

     

                                                                                           அம்பா 

                                         சரணம் 

ஆதிசங்கரர் அருளிச் சென்றதுவோ சௌந்தர்யலஹரி 

பீதி யடைந்து மருண்டு  நிற்கும் எந்தனக்கு அருளளிப்பாய் 

பாதியாய் பகவான் உடல் கொண்ட பராசக்தி அம்மையே 

நீதியா இது? நீசனெனக்கு பாராமுகமேனோ பகவதி தாயே 

                                                                                                  அம்பா

77. மாதவன் (கிருஷ்ணன் ) 23/07/2017)

                                                  பல்லவி 

மாசில்லா மாதவனை மனதினால் நினைத்திட்டால் 

தூசு போல் பறந்திடுமே  துன்பம் துயரெல்லாம்   

                                                                                  மாசில்லா 

                                           அனுபல்லவி 

காசு பணமென்னும் கானல் நீரைத் தேடித் திரியாதே 

ஈசல் போல் பிறவிச் சுடரில் சிக்கி எரிந்திடாதே 

                                                                                   மாசில்லா     

                                              சரணம் 

தாமரைக் குளத்து முதலை வாய் சிக்கிய யானைக்கும் 

தாமரைக் கண்ணாள் ஐவர் மனைவி பாஞ்சாலிக்கும் 

நாமார்ச்சனை ஒன்றினாலே ஓடி வந்து உதவிடும் 

கோமானை கோவிந்தனை சேவித்திடு பாலிப்பான் 

                                                                                    மாசில்லா

 

76. துவாரகாநாத் 06/05/2017

 

                                                           பல்லவி 

விளையாட்டுப்  பிள்ளையாய்  வீணில்  காலம்  கழித்தேனே 

களை நீக்கிட வந்திட்டுக் கற்றாழை நாட்டிட்டு களித்திருந்தேனே 

                                                                                                         விளையாட்டு 

                                                   அனுபல்லவி 

விளையும் பயிரை வளர்த்திடாமல் வீணாய் சிற்றின்பத்தில் 

திளைத்திருந்து தீவிரமாய் பாவந்தனை அறுத்திட்டேனே 

                                                                                                        விளையாட்டு

                                                சரணம் 

இகம் பரம் சுகம் துக்கமென்னும் இரு கரை  நடுவில் 

அகன்று சுழித்து ஓடிடும் காட்டாற்றில் சிக்கித் தவித்து 

மகன் மகள் மனைவி தாய் தந்தை உறவு சுற்றமென்று 

தகித்திடும் தாபத்தினின்று தூக்கிடுவாய் துவாரகநாதனே 

                                                                                                        விளையாட்டு