101 கர்ம யோகம் 5-3-2021

 பல்லவி 

கருமமே உனது அதிகாரமாகும்  அற்ப மனிதப் பதரே 

தருமமாகாது அதன் பலனை எதிர்பார்த்தல் எனவே 

                                                                                          கருமமே

                                        அனுபல்லவி 

கருவியாகாதே காரியத்தின் பலன் வருவதற்கே 

விரும்பி ஆதாயத்தை எத்தொழிலும் செய்யாதே 

                                                                                          கருமமே

                                           சரணம் 

சோம்பித் திரிதலும் சரியாகாதே மானுட உலகிற்க்கு  

தாமரை இலை த் தண்ணீர் போலே தனித்திருந்திடு 

சாம்பலும் எலும்புமே  எஞ்சி நிற்கும்  சாவிற்குப்  பின் 

தேம்பி அழுது என் பயன் நின் கடனே செய்து நின்றிடு 

                                                                                        கருமமே

 

100 அழிவில்லாதது 16-03-2021

                                                      பல்லவி 

ஆயுதங்கள் அழிக்கா நெருப்பும் எரிக்காததனை 

வாயு உலர்த்தாது நீரும் நனைக்காது ஆத்மாவினை                                                                                                                                                 ஆயுதங்கள் 

                                         அனுபல்லவி

சேயாகி இளைஞானாய் முதுமை அடைவது போல் 

ஆயுள் முடிந்து மரிப்பதுவும் ஒரு பருவமே கலங்காதே                                                                                                                                          ஆயுதங்கள் 

                                               சரணம்

மாயையால் நிறைந்த மேதினியில் நிலையேதுமில்லை 

காயமொழிந்த பின்னும் அழியாதிருப்பது ஆத்மாவே 

தீயவை நல்லவை சுகம் துக்கம் வெற்றி தோல்வி இவையால் 

ஆய பயன் ஏதுமில்லை நின் கடன் செய்து நிற்பாய்                                                                                                                                                          ஆயுதங்கள் 

                                     

99 சிவராத்திரி mar 11.2021

                                      பல்லவி   

 

சிவசிவ  ஹரஹர உமாபதே உய்விப்பாய் 

பவ பயம் பறந்தோடச் செய்வாய் பரமனே 

                                                                       சிவசிவ

                              அனுபல்லவி 

அவனியில்  அல்லல்படும் அடிமையெனக்கு 

தவப்பயனால்  தாபத்ரயம் அகலவேண்டும் 

                                                                       சிவசிவ

                                 சரணம் 

மாசிமாதம் சதுர்தசியன்று மாலை மஹாபூஜை செய்து 

மாசிலாமணியே மஹாதேவா நினை வந்தித்தேனே 

காசுபணம் வேண்டாம் மாடுமனையும் தேவையில்லை 

ஆசுதோஷனே அருளளிப்பாய் அருணாச்சல தேவனே 

                                                                        சிவசிவ

98 கிருஷ்ணன் 20-02- 2021

                                                          பல்லவி       

மதுர மதுர கீதமிசைக்கும் மனமோகன கிருஷ்ணா மாதவா 

மதுசூதனா மாயவா முரளி மனோகரா முராரே முதல்வா   

                                                                                         மதுர மதுர

                                                 அனுபல்லவி 

இதமுடன் இன்னல் தீர்ப்பாய் இம்மை மறுமை அகலவே 

பத மலர் பணிந்தேன் பார்த்தசாரதி பதீத பாவனனே 

                                                                                        மதுர மதுர\

                                                சரணம் 

நந்தகோபன் மகனே யசோதை மனமகிழும் மைந்தனே 

சிந்தாகுலம் தீர்த்திடுவாய் சிசுபாலனை வதைத்தவனே 

சந்ததம் சஞ்சித  பாவந்தனை சடுதியில் அகற்றிடுவாய் 

எந்தன் கலித் தீர்த்திடுவையே ஏந்தலே இதய தெய்வமே 

                                                                                        மதுர மதுர

97 ஆதிசிவன் 10-2-2021 2.11 pm

                                                          பல்லவி 

ஆதி சிவனே அம்மையப்பா  அருள் தாரும் ஆண்டவனே

பாதி உடல் அம்மைக்குத்  தந்தனையே பரம் பொருளே 

                                                                                            ஆதிசிவனே

                                        அனுபல்லவி 

நீதி சாஸ்த்திரம் கௌதமற்கு உபதேசம் செய்தனையே 

சோதிக்கலாகாது போதுமிந்த வேதனை முக்தி தாரும் 

                                                                                              ஆதிசிவனே

                                               சரணம் 

வந்தியின் துயர் தீர்க்க பிட்டுக்கு மண் சுமந்தனையே 

நந்தி முதலாம் கணங்களுக்கெல்லாம் தலைவனே 

சிந்திக்கும் போதெல்லாம் நின்னுருவே நிலை நிற்கும் 

செந்தமிழ் தலைச் சங்கத்தின் முதல்வா  முக்கண்ணா 

                                                                                           ஆதிசிவனே

96 கணபதி 7-2-2021 6.30 pm

                                                         பல்லவி 

கரிவதனா கலியுகக் கடவுளே கருணாமூர்த்தி கஜானனா 

விரிபாலையில்  திரிந்திடுமெனக்கு திக்கு நீயேயன்றோ      

                                                                                   கரிவதனா

                                                 அனுபல்லவி   

வரகணபதே    வரமளிப்பாய் வாழ்வளிப்பாய் வாரணமுகா 

சுரர்களுக்குள் அக்ரபூஜைக்கு அதிபதியானாய் ஆனைமுகா 

                                                                                     கரிவதனா

                                                    சரணம் 

புத்தி ப்ரதாயகா ப்ரதமேஷா பார்வதி சுதனே பதீதபாவனா 

சித்தி முக்தி அளித்திடும் சிவபாலனே சீராளா சித்திவிநாயகா 

நித்தமும் நினையே நினைந்துருகி நின்றேனே நீயே கதி 

சத்தியமாய் ஸர்வபாபநிவர்த்தி தந்திடுவாய்  சர்வேஸ்வரா 

                                                                                            கரிவதனா

95 சத்யநாராயண விரதம் Feb 6,2021

 பல்லவி 

 கலியுகக்  கடவுள் ச த்யநாராயணனை  வேண்டி விரதம் செய் 

நலன்கள் நான் கு பக்கத்தினின்றும் பறந்தோடி வந்திடுமே 

                                                                                      கலியுகக்

                                                அனுபல்லவி 

நலமுடன் நாரயணனை நாடி பூஜை செய்து கதை படித்து 

கலத்தில் பால், பழமுடன் சபாட் எனும் பண்டம் படைத்திடு 

                                                                                      கலியுகக்

                                                   சரணம் 

விரத மகிமை சூதர் சொல்வது, ப்ராஹ்மணன், விறகு வெட்டி 

வரமடைவது, வணிகனும்  மகளும் விரத பங்கத்தால் 

வருத்தமடைந்து விஷ்ணு பூஜை செய்து சுகந்தனை பெறுவது 

இடையர்  பூஜை அரசனுக்கு அறிவுருத்துவது இவையே கதையாம் 

                                                                                                                கலியுகக்