82 சுந்தரேஸ்வரர் (மதுரை) 31/07/2017

                                         பல்லவி 

ஆலகால விஷமருந்தி  அமரர்க்கு  அபயமளித்து 

நீலகண்டனாய் நித்தமும் நீள்விசும்பைக் காத்தாய் 

                                                                                         ஆலகால

                                      அனுபல்லவி 

ஆலால சுந்தரனாய் அங்கயற்கன்னி கரம் பிடித்து 

ஆலவாய் நகரில் அரசாட்சி செலுத்தும் ஆண்டவனே 

                                                                                          ஆலகால

                                          சரணம் 

அறுபத்துநான்கு ஆடல் புரிந்து அனைவரையும் ஆட்டுவித்தாய்    

அறுபத்து மூவர் அன்பருக்கும்  பேரருள் அளித்திட்டாய் 

சிறுபுத்தி கொண்ட சிந்தை நோயாளி எந்தனுக்கும் 

மறுமை நோய் வாராதிருக்க மன்னவனே மனங்கொள்வாய் 

                                                                                                   ஆலகால